Ахсынньы 10 күнүгэр Национальнай библиотекаҕа Медицина национальнай киинин кардиохирургия отделениетын сэбиэдиссэйин, медицинскэй наука докторын, РФ уонна СР үтүөлээх бырааһын Петр Иванович Захаровы кытта көрсүһүү буолла. Биллэрин курдук, иллэрээ сыл Петр Иванович, «Киһи соҕотох сүрэхтээх» диэн, сүрэх араас ыарыыларын операция көмөтүнэн эмтээһин туһунан, ааҕааччы киэҥ араҥатыгар анаан төрөөбүт тылынан суруйбут кинигэтэ, «Бичик» кинигэ кыһатыгар бэрт дьоҕус ахсаанынан бэчээттэнэн, ааҕааччы биһирэбилин ылыан ылбыта.

Историческай залга мустубут ааҕааччылар ортолоругар кардиохирург урут эмтээбит дьонноро, биллэр-көстөр суруналыыстар бааллар. Истиҥ-иһирэх кэпсэтии кэмигэр Петр Ивановичка үрдэ суох элбэх ыйытыы бэрилиннэ. Сүрэх ыарыытын дэгэтин, эпэрээссийэ ньыматын, эми туттуу туһатын-буортутун туһунан көһүтүллэр ыйытыктары сэргэ, соһуччу да санаалар элбэх буоллулар. Холобур, «хирург илиитэ хайдах буолуохтааҕый?» диэн ыйытыкка Петр Иванович: «Тоҕо эрэ хирург илиитэ кыра, нарын-намчы диэн өйдөбүл баар эрээри, хирург илиитэ улахана уонна күүстээҕэ ордук», – диэн хоруйдаата. Бэйэтин туйах хатарааччыларын туһунан, номнуо үс көлүөнэ сүрэх хирурдара үүнэн тахсыбыттарын, кинилэр ханнык да ыарахантан толлубаттарын уонна саамай үчүгэйэ – талан ылбыт идэлэрин бары олус таптыылларын туһунан эттэ.

Бу сэргэх тэрээһини Национальнай библиотека үлэһитэ Сардаана Васильевна Алексеева иилээн-саҕалаан ыытта. Кини П.И. Захаров хаһыаттарга, кинигэлэргэ тахсыбыт суруйууларынан улахан быыстапканы оҥорбут. Түмүккэ көрсүһүү кыттыылаахтара дириҥник ытыктаан «Саха Бокерията» диэн ааттыыр быраастарыгар бигэ доруобуйаны, өссө да эмтиир, сырдатар үлэтин киэҥ эйгэтигэр ситиһиилэри уонна сахалыы кинигэтэ элбэх ахсаанынан хаттаан тахсан улуустарга тарҕанарыгар баҕа санааларын тиэртилэр.

Мария Решетникова