Муус устар 2 күнүгэр М.Е. Николаев аатын Медицина Национальнай киинин Сүрэх-тымыр киинигэр СӨ бочуоттаах олохтооҕун, РФ уоннна СӨ үтүөлээх бырааһын Петр Иванович Захаров «Хирург сэһэнэ» кинигэтин биһирэмэ үрдүк таһымнаахтык ыытылынна. Кинигэ С.А. Новгородов аатынан «Айар» Национальнай кыһаҕа 2000 ахсаанынан Сахабыт сиригэр аһаҕас сүрэх эпэрээссийэтэ саҕаламмытын 25 сылыгар анаан бэчээттэнэн таҕыста. Манна даҕатан эттэххэ, биһирэм кэмигэр Петр Иванович эмтиир тэрилтэтин салалтата 50, идэлээх сойууһа 30 кинигэни атыылаһан ыланнар, ааптарга дьоһуннаах бэлэҕи оҥордулар.

Генеральнай дириэктэр Станислав Николаевич Жирков бу кинигэ сүрэх хирургиятын үйэтитиигэ уонна эдэр көлүөнэ эмчиттэргэ улахан суолталааҕын тоһоҕолоон бэлиэтээтэ. Бу кинигэни ааҕар кэмигэр бастакы эпэрээссийэлэри оҥоруу тыҥааһыннаах кэмнэрэ хараҕар киинэ курдук көстөн кэлбиттэрин эттэ. Оттон Сүрэх-тымыр киинин дириэктэрэ Күндүл Иванович Иванов хирург сахалыы сэһэнин аатырбыт Эмириэкэ хирурун Майкл Эллис Дебейки айымньыларыгар тэҥнээтэ.

Петр Иванович уустук идэтин айар үлэни кытта дьүөрэлээн барыта 7 кинигэни суруйбутуттан үһэ «Айар» кыһаҕа оҥоһуллубуттара. Онон дьоро тэрээһиҥҥэ кыһа генеральнай дириэктэрэ Август Васильевич Егоров, ааҕааччы киэҥ араҥатыгар туһуламмыт таһаарыы эрэдээксийэтин сэбиэдиссэйэ Надежда Петровна Андросова, талааннаах эрэдээктэрдэр – биллиилээх суруйааччы уонна суруналыыс Евдокия Семеновна Иринцеева-Огдо, эдэр, кэскиллээх исписэлиис Алина Анатолиевна Бурцева көхтөөх кыттыыны ыллылар. Сэһэни көҕүлээбит дьон, Петр Иванович бачча халыҥ кинигэни сыл аҥаарын устата кум-хам тутан кэбиспитин сөҕө-махтайа кэпсээтилэр. Бу иннинээҕи «Сүрэх хирург хараҕынан» кинигэтэ 2000 ахсаанынан тахсаат, түргэнник бүтэн рекорду олохтообутун, итиэннэ муус устар 9 күнүгэр Н.Д. Неустроев аатынан Смарт-бибилитиэкэҕэ Петр Ивановичка автограф-сессия тэриллиэхтээҕин туһунан сырдаттылар.

Филология билимин дуоктара, профессор Варвара Борисовна Окорокова, Мединститут дириэктэрэ Николай Михайлович Гоголев, ааҕааччы, суруналыыс Надежда Петровна Аргунова, сүрэх хирура Василий Степанович Сивцев саҥа кинигэни сыныйан ааҕан, кэрэхсэбиллээх ырытыылары оҥордулар.

Биллэн турар, сүрэх хируругар эмтэммит дьон алгыстаах тылларын долгуйан тириэртилэр. Ол курдук аар-саарга аатырбыт «Кэнчээри» оҕо народнай ансаамбылын салайааччыта, РФ уонна СӨ култууратын үтүөлээх үлэһитэ Василий Степанович Парников Петр Ивановичка түөртэ эпэрээссийэлэнэн үйэтин уһатан айа-тута сылдьарыгар истиҥник махтанна. Саха араадьыйатын чаҕылхай сулуһун Тарас Лукич Тарасов-Тускул куолаһа баар дьону сэргэхситтэ, үөртэ.

Петр Ивановиһы эҕэрдэлии төрөөбүт-үөскээбит Кэбээйититтэн улуус дьаһалтатын баһылыгын эбээһинэһин толорооччу Александр Сидорович Сивцев, култуура салаатын салайааччыта Илья Николаевич Алексеев, ырыаһыт Константин Степанов аат ааттаан кэлбиттэр. СӨ Ытык Сүбэтиттэн Макар Макарович Яковлев, Василий Иннокентьевич Сорокоумов, Иннокентий Николаевич Аммосов, Полина Иннокентьевна Амбросьева, доруобуйа харыстабылын салайааччылара Владимир Степанович Попов, Алквиад Валентинович Булатов, саха биллиилээх хирурдара Валерий Дидимович Слепцов, Виктор Георгиевич Игнатьев, Григорий Дмитриевич Бугаев, Александр Пантелеймонович Семенов, Людмила Афанасьевна Попова, Сайсаар Айтыына Таман Кыыһа, Алексей Петрович Слепцов, ааптар оскуолаҕа, Томскайга бииргэ үөрэммит үөлээннээхтэрэ о.д.а. эҕэрдэҕэ кыттыстылар.

Медицина Национальнай киинигэр маннык хабааннаах улахан тэрээһин аан бастаан сахалыы тылынан ыытылынна. Онуоха биһиэхэ, эмчиттэр ортолоругар, сахалыы тыллаах, сахалыы куттаах айар-тутар дьон бааллара олук буолла. Үрүҥ халааттаах аанньаллар уонна ааҕааччылар «Алмаз» саалаҕа тоҕуоруһа мустан, эбии олбохтору киллэрэн, эдэр-сэнэх өттө туран эрэ иһиттилэр, сүргэлэрэ көтөҕүллэн тарҕастылар.